Peynirli ve Maydanozlu Alt Üst Böreği

Kabaca iki yumaklık hamur tedârik olunmak üzere iki yumurta biraz külü durulmuş su ile çalkanıp ve dakik ilâvesiyle hamur edildikte ikiye taksîm olunup birinci yufka açılır.

Tepsinin evvelce zemini yağlanarak yufka serilir. Rendeden geçmiş peynire iki yumurta ve mikdâr-ı vâfi tuz ve maydanoz doğranılarak güzelce karıştırılıp tepsinin her cihetine müsâveten ve nihâyet bir parmak kadar kalınlığında olmak üzere içi muntazaman döşenir.

Diğer ikinci yumak da açılıp üzerine serilir ve kenarları çimdiklenir. Yanmış sâdeden bir kepçe ile üzerine gezdirdikten sonra tepsiyi köz ateşe oturtmalı.

Çeke çeke ve ara sıra silke silke ve tepsinin kenarlarından kaşık ile sâde bırakılarak kızardıkta üzerine bir sini kapayıp su böreği gibi altı üstüne çevrilerek üstü de kızardıkta sıcak iken murabba’ü’ş-şekl kesip tabağa çıkararak tenâvül oluna. Pek hoş olur.

Peynirli maydanozlu iç yerine bazen kavrulmuş soğan ve kıyma yaparlar ve bazen de sadece soğan ile yaparlar.